Genesis 16
Hagaita Ismael hamale koko
1A꞉iblam ya꞉llu Selaiye yimlala pohohomalalo hamkapi polaiyo. Epeleye ya꞉ aya dulu dla Isip a꞉ya ipilalo haleta ya꞉ oko hamhalaiyo, ya꞉ hiye Hagai. 2Epapeleye Selaita A꞉iblam watle epo atlaiyo, “Na꞉Godta na꞉ta yimlala hohomolowe apiye godena. Epapedeme wa꞉ wata tame na꞉ oko a꞉ya ipilalo Hagai hane. Epame ya꞉ta yimlala hatitimelepiye, eye nolëpo,” diyo. Epalati A꞉iblamta Selai yu dla dalepo ka꞉dena depame Hagaiye haiyo. Epedeme koko iye A꞉iblamta tame Keinan mo dla sokomoko 10 halale oloma edla apiyo. Epalati alotle Hagaita ya꞉ta mopapo polaleye natipame A꞉iblam ya꞉llu ikadepe Selaiye kokosa꞉mdiyo.5Epalati Selaita A꞉iblam watle epo atlaiyo, “Hagaita na꞉ kokosa꞉mhala kokoye e mo-wa꞉ batalimalepo. Amasiyama na꞉ta ya꞉ye wa꞉ watle hamiwapo, epapele tlope ma ya꞉ta mopapo polale natipame ma na꞉ye kokosa꞉mhalapo. EpedemeGodta wa꞉ mate epo na꞉ mate di kokoye gladlowe ka꞉dena,” diyo.
6Epalati A꞉iblamta asiyama ya꞉ watle epo atlaiyo, “Hagai iye wa꞉ oko a꞉yapo. Epedeme wa꞉ta solotamale koko ya꞉ dla halowedeme me-hane,” diyo. Epalati Selaita Hagai dla kasilamama ya꞉ dla wotiyalle hapimhallati ya꞉tapo wota꞉mama alikili dla woyapo teletaiyo. 7Hagaita teletame dalupa dulu dla woyapo ma Sul mo dla tlalo api alikili dla yú matale hallati medla polaiyo. EpalatiGod ya꞉ banakaka oplamita tulume ya꞉ watle epo atlaiyo, 8“Hagai, Selai ya꞉ oko a꞉ya, wa꞉ hadima tlowedeme adi tle puame poloma꞉?” diyo.
Epalati asiyama Hagaita epo atlaiyo, “Na꞉ye na꞉ omhallalo a꞉ya Selai tle alikili dla woyapo tama,” diyo.
9EpalatiGod ya꞉ banakaka oplamitapo ma ya꞉ watle epo atlaiyo, “Wa꞉ ma ilamtame wa꞉ omhallalo a꞉ya Selai yu dla salladepo sela꞉ne,” diyo. 10Epame ma epo atlaiyo, “Wa꞉ta mopapo polaye hatostamama maseyemala hamelepe. Epalati wa꞉tapo ya꞉ hiye Ismael ▼
▼16:11 Ismael hi i ya꞉ dulu kokoye God ya꞉ opa yu dallalo demama apopo.
dlepe. Adipalati, wa꞉ta dupa kolle kokoyeGodta ma-daluwapo. Epame na꞉tapo wa꞉ awaduloye sikemte pasatepo mellowepo. Epalati oplami haleta posesa꞉pa꞉mellowa. 12Amasiyama wa꞉ maseyemala Ismaeltapo aliya yowo some itiyamale mate halemama opa hapuloma dla opahale demhallepe. Epammama ya꞉ eidulo mate ma opahale demhallepe.”13Epame Hagaita koko i natipo sikemte yelemama epo malamaiyo, “Yao ikadepe, na꞉ ikadepe God natili tlope na꞉ popowasema,” diyo. Epammama ya꞉tapoGod hi semama, na꞉ natimhallalo God diyo. 14Epapele koko tle opatapo yú matale e semama Bel Lahai Loi ▼
▼16:14 Bel Lahal Loi hi ya꞉ dulu kokoye na꞉ natimhallalo God ya꞉ yú matale demama apopo.
demdiyo. Yú matale iye Kades mo ka꞉ epo Beled mo ka꞉ duka dla halaiyo.15A꞉iblamta 86 sokomoko halale oloma edla Hagaita maseyemala hamaiyo. Epalati A꞉iblamta maseyemala watle Ismael hiye hamiyo. c
Copyright information for
XLA